कोस्टल रोडवर भारतातील पहिला मेडोली रस्ता!

मुख्यमंत्री देवेंद्र फडणवीसांच्या उपस्थितीत उद्घाटन

अमरसन्स गार्डनजवळ ५०० मीटरवर चाकाच्या घर्षणातून स्वरांची निर्मिती

मुंबई, दि. ११ : मुंबईचा महत्त्वाकांक्षी प्रकल्प म्हणून ओळखल्या जाणाऱ्या धर्मवीर स्वराज्य रक्षक छत्रपती संभाजी महाराज सागरी किनारी रस्त्याला (कोस्टल रोड) आता नवी ओळख मिळाली आहे. मुंबईच्या वाहतुकीत महत्त्वाची भूमिका बजावणारा हा मार्ग आता देशातील सर्वांत पहिला संगीतमय (मेलोडी) रस्ता म्हणून ओळखला जाणार आहे. या रस्त्याचे उद्घाटन बुधवारी मुख्यमंत्री देवेंद्र फडणवीस यांच्या उपस्थितीत मुंबईतील भुलाभाई देसाई मार्ग परिसरातील अमरसन्स गार्डन जवळ करण्यात आले.

यावेळी मुख्यमंत्री फडणवीस यांचे वाहन या मेलोडी पट्ट्यांवरून धावताच स्लमडॉग मिलेनियर या चित्रपटातील लोकप्रिय ‘जय हो’ गाण्याच्या संगीताचा आवाज ऐकू आला. यावेळी त्यांच्या समवेत वाहनात उपमुख्यमंत्री एकनाथ शिंदे, माजी खासदार राहुल शेवाळे, मुंबई महापालिकेचे अतिरिक्त आयुक्त अविनाश ढाकणे, हंगेरी देशाचे कौन्सिल जनरल फ्रेंक जारी उपस्थित होते.

यानंतर पत्रकारांशी बोलताना फडणवीस म्हणाले, धर्मवीर स्वराज्य रक्षक छत्रपती संभाजी महाराज सागरी किनारी मार्गावरून उजवीकडील मार्गिकेवर प्रवास करताना संगीतमय रस्त्याचा अनुभव येणार आहे. ही अभिनव संकल्पना आहे. वाहनचालकांना अद्ययावत हंगेरियन तंत्रज्ञानाच्या सहाय्याने ‘जय हो’ या स्लमडॉग मिलेनियर या चित्रपटातील जगप्रसिद्ध गाण्याची धून ऐकण्याची पर्वणी मिळणार आहे. पहिल्या टप्प्यात या रस्त्यावर ५०० मीटर लांब विशेष संगीतमय रिब्स (पट्ट्या) बसविण्यात आल्या आहेत. या पट्ट्यांमधील विशिष्ट अंतर आणि त्यावरून ताशी ६० ते ७० किलोमीटर प्रति वेगाने जाणाऱ्या वाहनाच्या चाकाचे होणारे घर्षण यामुळे स्वरांची निर्मिती होते. हे स्वर त्या वाहनातील प्रवाशांना ऐकू येतील. आंतरराष्ट्रीय दर्जाचे अद्ययावत तंत्रज्ञान, भारतीय संस्कृती आणि संगीताचा सुंदर मिलाफ म्हणून संगीतमय रस्ता देशभरात कुतूहलाचा विषय ठरणार आहे, असे मुख्यमंत्री म्हणाले.

काय आहे मेलोडी रस्ता?

• भारतातील पहिला मेलोडी रस्ता
• दक्षिणेकडून उत्तरेकडे जाताना मरीन ड्राइव्हवरील बोगदा संपल्यावर संगीतमय रस्त्याचा प्रारंभ.
• पहिल्या मार्गिकेवर पहिल्या टप्प्यात ५०० मीटरपर्यंत विशेष पट्ट्या.
• रस्त्यावरील विशेष पट्ट्या आणि ६० ते ७० च्या गतीने जाणाऱ्या वाहनाच्या चाकांच्या घर्षणातून स्वरांची निर्मिती.
• वाहनातील प्रवाशांना कोणत्याही वेगळ्या उपकरणाशिवाय वाहनात ऐकू येतोय ‘स्लमडॉग मिलेनियर’ चित्रपटातील ‘जय हो’ गाण्याचे संगीत.

……………………